ప్రపంచ టెక్నాలజీ-ఇ.కామర్స్ దిగ్గజాల్లో ఒకటైన ‘‘అమెజాన్.కామ్’’ అధిపతి జెఫ్ బెజోస్ (57) కంపెనీ సి.ఇ.ఒ. బాధ్యతల నుంచి వైదొలిగారు. 27 సంవత్సరాల క్రితం కేవలం ఆన్ లైన్ లో పుస్తకాల అమ్మకంతో ప్రారంభమైన అమెజాన్ నేటి మార్కెట్ విలువ ఒకటిన్నర ట్రిలియన్ డాలర్లకు పైగా ఉంది. జెఫ్ బెజోస్ ఇప్పుడు ప్రపంచంలోనే అత్యంత ధనవంతుడు. అంతే కాదు... 200 బిలియన్ డాలర్లకు పైగా నికర విలువ కలిగిన తొలి వ్యక్తిగా రికార్డులకు ఎక్కాడు. సి.ఇ.ఒ.గా తప్పుకున్నప్పటికీ, ఎగ్జిక్యూటివ్ ఛైర్ గా బెజోస్ కీలకంగా కొనసాగనున్నారు.

మాంసాహారం తినడం కూడా నేరం అన్నట్టుగా ఆటవికంగా మూక హత్యలు చేసిన ఉదంతాలు గత ఏడేళ్లలో ఎన్నో వెలుగు చూశాయి. వాటిపైన రాష్ట్రీయ స్వయంసేవక్ సంఘ్ (ఆర్ఎస్ఎస్) అధినేత మోహన్ భగవత్ తాజాగా స్పందించారు. మూక హత్య (Lynching)లకు పాల్పడినవారు హిందూత్వ వ్యతిరేకులని భగవత్ వ్యాఖ్యానించారు. విశ్వాసాలను బట్టి ప్రజలను విభజించకూడదని కూడా ఆయన పేర్కొన్నారు. దేశంలో ఐక్యత లేకుండా అభివృద్ధి సాధ్యం కాదన్న భగవత్, ఐక్యతకు ప్రాతిపదిక జాతీయత, పూర్వీకుల వైభవమేనని సూత్రీకరించారు.

విద్యుత్ ఉత్పత్తికి మాత్రమే ఉద్దేశించిన శ్రీశైలం ప్రాజెక్టు ద్వారా తెలంగాణకు హక్కుగా కేటాయించిన నీటిని వాడుకుంటుంటే, ఉత్పత్తిని ఆపాలని ఆంధ్రా ప్రభుత్వం కెఆర్ఎంబీకి ఫిర్యాదు చేయడం హాస్యాస్పదమని సిఎం కేసీఆర్ అధ్యక్షతన శనివారం జరిగిన ఉన్నత స్థాయి సమావేశం అభిప్రాయపడింది. 51% ‘క్లీన్ ఎనర్జీ’ ఉత్పత్తి చేస్తూ పర్యావరణ పరిరక్షణకు పాటుపడాలని కేంద్రం విడుదల చేసిన మార్గదర్శకాలకు అనుగుణంగా జరుగుతున్న జల విద్యుత్ ఉత్పాదనను ఇక ముందు కూడా కొనసాగించాలని సమావేశం తీర్మానించింది.

‘‘నీటి కేటాయింపులు, పర్యావరణ అనుమతులు లేకుండా... జాతీయ గ్రీన్ ట్రిబ్యునల్ స్టే వున్నప్పటికీ కృష్ణా నదిపై ఆంధ్రప్రదేశ్ నిర్మిస్తున్న చట్టవ్యతిరేక పోతిరెడ్డిపాడు ప్రాజెక్టును తెలంగాణ ప్రభుత్వం గుర్తించడంలేదని సీఎం కేసీఆర్ అధ్యక్షతన జరిగిన ఉన్నతస్థాయి సమావేశం తీర్మానించింది.’’ అని తెలంగాణ సిఎం కార్యాలయం శనివారం ప్రకటించింది. కృష్ణా జలాల్లో తెలంగాణ హక్కులను, రాష్ట్ర రైతాంగ ప్రయోజనాలను కాపాడుకోవడానికి రాజీ లేని పోరాటం కొనసాగించాలని ఆ సమావేశంలో నిర్ణయించారు.

కొత్తగా ట్రిబ్యునల్ కేటాయింపులు జరిపేదాకా కృష్ణా జలాల్లో చెరి సగం వాడుకోవాలనే వాదనను తెలంగాణ ప్రభుత్వం శనివారం ముందుకు తెచ్చింది. తెలుగు రాష్ట్రాలకు ఉన్న నికర జలాల కేటాయింపు 811 టిఎంసిలలో 405.5 టిఎంసిల చొప్పున రెండు రాష్ట్రాలు వినియోగించుకోవాలని కేసీఆర్ అధ్యక్షతన జరిగిన ఉన్నత స్థాయి సమావేశంలో తీర్మానించారు. ఆంధ్రప్రదేశ్, తెలంగాణ మధ్య ఇప్పటివరకు అమలైన 66:34 నిష్ఫత్తిని ఈ సమావేశం తిరస్కరించింది.

ఉత్తరప్రదేశ్ జిల్లా పంచాయతీ ఛైర్మన్ ఎన్నికల్లో బిజెపి 75 సీట్లకు గాను 67 కైవసం చేసుకుంది. 22 సీట్లు ముందే ఏకగ్రీవం కాగా 21 బిజెపి పరమయ్యాయి. ఎన్నికలు జరిగిన 53 స్థానాల్లో బిజెపికి 46 దక్కాయి. సమాజ్ వాదీ పార్టీకి 6 ఛైర్మన్ సీట్లు దక్కాయి. అయితే, ఈ ఎన్నికల్లో బిజెపి బలప్రయోగానికి, కిడ్నాప్ లకు పాల్పడిందని ‘సమాజ్ వాదీ’ నేతలు ఆరోపించారు. ఫలితాల ప్రకటన తర్వాత అనేక కలెక్టర్ కార్యాలయాల ఎదుట ఆందోళనకు దిగారు. ఏకగ్రీవ స్థానాల్లో ప్రధాని మోదీ ప్రాతినిధ్యం వహిస్తున్న వారణాసి, సిఎం యోగి అడ్డా గోరఖ్ పూర్ ఉన్నాయి.

ఉత్తరాఖండ్ లో ఆదినుంచీ రాజకీయ అస్థిరత్వమే రాజ్యమేలుతోంది. 2000 సంవత్సరం నవంబరులో రాష్ట్రం ఏర్పడ్డాక, సగటున రెండేళ్ళకు ఒకరు చొప్పున సిఎంలు మారారు. ఉత్తరప్రదేశ్ ముఖ్యమంత్రిగా పని చేసిన ఎన్డీ తివారీ మాత్రమే విభజిత రాష్ట్రానికి ఐదేళ్లపాటు సిఎంగా పని చేశారు. మిగిలిన ఏ ఒక్కరూ ఐదేళ్ళ పదవీ కాలాన్ని పూర్తి చేయలేదు. ‘‘దేవభూమి’’లో ఎక్కువమంది అవినీతి ఆరోపణలు, పార్టీలో తిరుగుబాట్లతో పదవి కోల్పోయారు. పదేళ్ల కాంగ్రెస్ హయాంలో ముగ్గురు పాలించగా, బిజెపి 11 ఏళ్ళ కాలంలో ఏడో వ్యక్తి తాజాగా సిఎం అయ్యారు.

ఫ్రీలాన్స్ జర్నలిస్టు రాజీవ్ శర్మను ఎన్ఫోర్స్ మెంట్ డైరెక్టరేట్ (ఇ.డి) శనివారం అరెస్టు చేసింది. చైనా కంపెనీలతో శర్మ భారీగా లావాదేవీలు నడిపినట్టు ఇ.డి. ఆరోపించింది. శర్మ వంటి వ్యక్తులకు పారితోషికం చెల్లించడం కోసం చైనా కంపెనీలు ఆ దేశ గూఢచార సంస్థలకు మధ్యవర్తులుగా వ్యవహరిస్తున్నాయని పేర్కొంది. శర్మను ప్రత్యేక కోర్టు ఏడు రోజుల ఇ.డి. కస్టడీకి అప్పగించింది. చైనా గూఢచార సంస్థలకు రహస్య సమాచారాన్ని చేరవేస్తున్నాడనే ఆరోపణలతో ఢిల్లీ పోలీసులు ఇదివరకే రాజీవ్ శర్మను అరెస్టు చేశారు.

ఉత్తరాఖండ్ లో 4 నెలల్లో మూడో సిఎంగా పుష్కర్ సింగ్ ధామి ప్రమాణ స్వీకారం చేశారు. ఎమ్మెల్యే కాని తీరథ్ సింగ్ రావత్ (ఎంపీ) మోదీ-షా దన్నుతో మార్చి 10న సిఎంగా బాధ్యత చేపట్టారు. పుష్కరాల్లో కోవిడ్ వ్యాప్తి, టెస్టుల కుంభకోణం సహా అనేక వివాదాలు ఎదుర్కొన్నారు. అయితే, పదవి చేపట్టాక ఆరు నెలల్లో ఎమ్మెల్యేగా ఎన్నిక కావాలన్న రాజ్యాంగ నిబంధన అమలయ్యే పరిస్థితి లేకనే రాజీనామా చేస్తున్నట్టు రావత్ చెప్పారు. మరో ఆర్నెల్లలో అసెంబ్లీ ఎన్నికలు జరగాల్సి ఉండగా, ఒక్క స్థానానికి ఉప ఎన్నిక కుదరదని ఈసీ స్పష్టం చేసింది.

రఫేల్ యుద్ధ విమానాల కొనుగోలులో జరిగిన అవినీతిపై సంయుక్త పార్లమెంటరీ కమిటీ (జెపిసి)తో విచారణ జరిపించాలన్న డిమాండ్ ను కాంగ్రెస్ పార్టీ పునరుద్ఘాటించింది. 36 విమానాల అమ్మకానికి 2016లో కుదిరిన ఒప్పందంలో అవినీతి చోటు చేసుకుందన్న అనుమానంతో ఫ్రాన్స్ పబ్లిక్ ప్రాసిక్యూషన్ కార్యాలయం (పి.ఎన్.ఎఫ్) దర్యాప్తునకు ఆదేశించిన నేపథ్యంలో కాంగ్రెస్ ప్రధాన కార్యదర్శి రణదీప్ సూర్జేవాలా మీడియాతో మాట్లాడారు. రఫేల్ ఒప్పందంలో అవినీతి జరిగిందన్న తమ నేత రాహుల్ గాంధీ వాదన రుజువైందని సూర్జేవాలా పేర్కొన్నారు.