దశ 1: విలీనం ; దశ 2: దుర్వినియోగం ; దశ 3: భారీ నష్టాలను చూపించడం ; దశ 4: క్రోనీ క్యాపిటలిస్ట్‌కు చౌకగా అమ్మడం... బిఎస్ఎన్ఎల్, ఎంటిఎన్ఎల్ విలీనానికి కేంద్ర మంత్రివర్గం పచ్చజెండా ఊపిన వెంటనే కాంగ్రెస్ నేత రాహుల్ గాంధీ స్పందన ఇది. మంత్రివర్గ నిర్ణయాలను కేంద్ర మంత్రి రవిశంకర్ ప్రసాద్ ప్రకటించగానే రాహుల్ ఈ నాలుగు లైన్లను ట్వీట్ చేశారు. ప్రధాని మోదీ తన అత్యాశాపరులైన మిత్రులకు ప్రభుత్వ ఆస్తులను కట్టబెడుతున్నారని రాహుల్ నిన్న కూడా విమర్శించారు.

రాష్ట్ర రాజధానిని ఎక్కడ నిర్మించాలని నిపుణుల కమిటీ నిర్దేశిస్తే అక్కడే చేపడతామని రాష్ట్ర పురపాలక శాఖ మంత్రి బొత్స సత్యనారాయణ చెప్పారు. ఈ అంశంపై బొత్స బుధవారం అమరావతిలో విలేకరులతో మాట్లాడారు. అమరావతికోసం రైతులు 33 వేల ఎకరాలు ఇచ్చారని చంద్రబాబు పదే పదే చెబుతున్నారని, రాజధాని ఎక్కడ నిర్మించినా లక్ష ఎకరాలు కూడా ఇవ్వడానికి ప్రజలు సిద్ధంగా ఉన్నారని బొత్స వ్యాఖ్యానించారు. అధికారంలో ఉన్న ఐదేళ్లలో అమరావతిలో ఒక్క శాశ్వత కట్టడమైనా నిర్మించారా? అని బొత్స ప్రశ్నించారు.

మాజీ క్రికెటర్ నవజ్యోత్ సింగ్ సిద్ధూ మళ్లీ బీజేపీలో చేరవచ్చంటూ వస్తున్న వార్తలు కేవలం వదంతులేనని ఆయన భార్య నవజ్యోత్ కౌర్ స్పష్టం చేశారు. పంజాబ్ ముఖ్యమంత్రి అమరీందర్ సింగ్ తన శాఖను మార్చడంతో సిద్ధూ గత జూలైలో రాజీనామా చేసిన సంగతి తెలిసిందే. ఆ తర్వాత నవజ్యోత్ కౌర్ పార్టీకి దూరమయ్యారు. ఈ నేపథ్యంలో సిద్ధూ తిరిగి బీజేపీలో చేరతారని ప్రచారం జరుగుతోంది. ఆ ప్రచారాన్ని ఖండించిన నవజోత్ కౌర్, తమకు సిఎం అమరీందర్ సింగ్ తో ఎలాంటి విభేదాలూ లేవన్నారు. తాను ఏ పార్టీలో లేనని కూడా స్పష్టం చేశారు.

‘‘హైదరాబాదులో ఏదో చేశానని అంటున్నావ్. ఏం చేశావ్’’ అని మాజీ సీఎం చంద్రబాబును ఏపీ మంత్రి బొత్స సత్యనారాయణ ప్రశ్నించారు. తనకంటే ముందు పని చేసిన సీఎంలు శంకుస్థాపన చేసినవి చంద్రబాబు నిర్మిస్తే తన ఘనతగా చెప్పుకొంటారని, తాను శంకుస్థాపన చేసినవి తర్వాత ముఖ్యమంత్రులు నిర్మించినా అవీ తన ఖాతాలోనే వేసుకుంటారని బొత్స ఎద్దేవా చేశారు. ‘‘జనార్ధనరెడ్డి శంకుస్థాపన చేసిన సైబర్ సిటీని ఈయన నిర్మించాడు. సరే! ఎయిర్ పోర్టును, పీవీ ఎక్స్ ప్రెస్ వేను రాజశేఖరరెడ్డి నిర్మిస్తే అవీ నేనే కట్టానంటాడు’’ అని వ్యాఖ్యానించారు.

తెలంగాణలో ఆర్టీసీని ప్రభుత్వంలో విలీనం చేయాలన్న డిమాండ్ నుంచి వెనక్కు తగ్గేది లేదని కార్మిక సంఘాల ఐక్య కార్యాచరణ సమితి కన్వీనర్ అశ్వత్థామరెడ్డి స్పష్టం చేశారు. విలీనం మినహా మిగిలిన డిమాండ్లను పరిశీలించడానికంటూ ఆర్టీసీ అధికారులతో ప్రభుత్వం ఓ కమిటీని ఏర్పాటు చేసిన నేపథ్యంలో అశ్వత్థామరెడ్డి స్పందించారు. తెలంగాణ ఏర్పాటైతే ఆర్టీసీ కార్మికులను ప్రభుత్వ ఉద్యోగులుగా గుర్తిస్తామని హామీ ఇచ్చారని గుర్తు చేశారు. కార్మిక సంఘాల ఐక్యత దెబ్బతినదని అశ్వత్థామరెడ్డి చెప్పారు.

కేంద్ర ప్రభుత్వ పెద్దల వద్ద ఒక ఎంపికి ఉన్న విలువ కూడా ఆంధ్రప్రదేశ్ ముఖ్యమంత్రికి లేదని సిపిఐ రాష్ట్ర కార్యదర్శి రామకృష్ణ ఎద్దేవా చేశారు. గత రెండు రోజుల్లో సిఎం జగన్ ఢిల్లీ పర్యటనలో ఏం జరిగిందో వెల్లడించాలని డిమాండ్ చేశారు. 21, 22 తేదీల్లో ఢిల్లీలో ఉన్న జగన్మోహన్ రెడ్డికి సోమవారంనాడు అమిత్ షా అపాయింట్ మెంట్ దొరకలేదు. అదే రోజు నిజామాబాద్ ఎంపీ (బిజెపి) మాత్రం అమిత్ షాను కలిశారని వార్తలు వచ్చాయి. ఈ నేపథ్యంలో రామకృష్ణ ఏపీ సిఎంపై వ్యంగ్యాస్త్రం సంధించారు.

రాష్ట్ర ప్రభుత్వ తీరు చూస్తుంటే... అధికార పార్టీకి అసాధారణ మెజారిటీ ఇచ్చి ప్రజలు తప్పు చేశారా? అనే భావన కలుగుతోందని జనసేన అధినేత పవన్ కళ్యాణ్ వ్యాఖ్యానించారు. బుధవారం పార్టీ కార్యాలయంలో ఒంగోలు లోక్ సభా నియోజకవర్గ నేతలతో సమావేశమైన సందర్భంగా ఆయనీ అంశాన్ని ప్రస్తావించారు. కేసులు ఉన్నవాళ్లు ఢిల్లీలో ఉన్నవాళ్లతో గట్టిగా మాట్లాడలేరని పవన్ అభిప్రాయపడ్డారు. వైఎస్ఆర్ కాంగ్రెస్ ప్రభుత్వం కొద్ది కాలంలోనే ప్రజల నమ్మకాన్ని కోల్పోయిందన్నారు.

ముఖ్యమంత్రి కె. చంద్రశేఖరరావు తెలంగాణ సిద్ధాంతకర్త జయశంకర్ ఆశయాలను కాకుండా జూపల్లి రామేశ్వర్ రావు, చినజీయర్ స్వామి ఆశయాలను కొనసాగిస్తున్నారని టీడీపీ నేత నన్నూరి నర్సిరెడ్డి వ్యాఖ్యానించారు. తెలంగాణ ఆర్టీసీ కార్మికుల సమ్మెకు మద్ధతుగా బుధవారం జరిగిన సభలో ఆయన మాట్లాడారు. మందులో సోడా కలిపాడని జగదీశ్వర్ రెడ్డికి మంత్రి పదవి ఇచ్చిన కేసీఆర్, ప్రజలకు ఏమిచ్చాడని ప్రశ్నించారు. తెలుగుదేశం శాసనసభా పక్ష పార్టీని టీఆర్ఎస్ లో కలిపేసిన ఎర్రబెల్లికి ప్రభుత్వంలో ఆర్టీసీని కలపడం ఎందుకు సాధ్యపడదని ప్రశ్నించారు.

మంచి లాభాల్లో ఉన్న ప్రభుత్వ రంగ సంస్థ కంటైనర్ కార్పొరేషన్ అమ్మకానికి కేంద్ర ప్రభుత్వం చేస్తున్న ప్రయత్నాలను కాంగ్రెస్ పార్టీ నేత రాహుల్ గాంధీ తప్పు పట్టారు. ప్రధానమంత్రి మోదీ స్నేహితులైన కొందరు అత్యాశాపూరిత ఆశ్రిత పెట్టుబడిదారులు కంటైనర్ కార్పొరేషన్ పట్ల ఆకలితో ఉన్నందునే ప్రభుత్వం అమ్మకానికి ప్లాన్ చేసిందని దుయ్యబట్టారు. మంగళవారం కార్పొరేషన్ యూనియన్ సభ్యులను కలసిన రాహుల్, వారి వినతిపత్రాన్ని షేర్ చేయాల్సిందిగా ట్విట్టర్లో కోరారు.

కాంగ్రెస్ అధ్యక్షురాలు సోనియా గాంధీ బుధవారం తీహార్ జైలుకు వెళ్ళి అక్కడున్న కర్నాటక నేత డి.కె. శివకుమార్ ను కలిశారు. ఆమెతో పాటు పార్టీ ప్రధాన కార్యదర్శి కె.సి. వేణుగోపాల్ ఉన్నారు. కర్ణాటక కాంగ్రెస్ ముఖ్య నాయకుడు డి.కె. శివకుమార్, సెప్టెంబర్ 3న అరెస్టయ్యారు. గత 50 రోజులుగా జ్యుడీషియల్ కస్టడీలో ఉన్నారు. మనీలాండరింగ్ కేసులో ఎన్‌ఫోర్స్‌మెంట్ డైరెక్టరేట్ ఆయనను అరెస్టు చేసింది. సోనియా గాంధీ తీహార్ జైలుకు వెళ్లడం ఇది రెండోసారి. గత నెలలో ఆమె మాజీ ఆర్థిక మంత్రి పి. చిదంబరంను ఇక్కడ కలిశారు.