ఏపీకి కీలకమైన పోలవరం ప్రాజెక్టుపై ముఖ్యమంత్రి చంద్రబాబునాయుడు 89వ సారి వర్చువల్ రివ్వూ చేశారు. సోమవారం మంత్రివర్గ సమావేశం అనంతరం చేపట్టిన ఈ సమీక్షలో.. ఇప్పటికి ప్రాజెక్టు నిర్మాణం 66.36 శాతం పూర్తయినట్టు అధికారులు తెలిపారు. కాంక్రీట్ పనులు 65.30 శాతం, తవ్వకం పనులు 82.60 శతం, కుడి ప్రధాన కాలువ 90.29 శాతం, ఎడమ ప్రధాన కాలువ 68.74 శాతం పూర్తయినట్టు వివరించారు. ఎగువ కాఫర్ డ్యామ్ పనులు 25.73 శాతం, దిగువ కాఫర్ డ్యామ్ పనులు 10.17 శాతం పూర్తయ్యాయని అధికారులు తెలిపారు.

50 ఏళ్లపాటు 5 ఎయిర్ పోర్టుల నిర్వహణ కాంట్రాక్టును దక్కించుకోవడానికి అదానీ గ్రూపు ‘అసాధారణ’ రేట్లను కోట్ చేసింది. ఉదాహరణకు అదానీ సొంత రాష్ట్రంలోని అహ్మదాబాద్ ఎయిర్ పోర్టుకోసం జీఎంఆర్ ఒక్కో ప్రయాణీకుడికి రూ. 85 చొప్పున ప్రభుత్వానికి ఆఫర్ చేయగా, అదానీ ఏకంగా రూ. 177 కోట్ చేశారు. రెండో బిడ్డర్ కంటే అదానీ రెట్టింపు ఆఫర్ చేయడం గమనార్హం. లక్నో ఎయిర్ పోర్టుకు అదానీ రూ. 171 కోట్ చేస్తే రెండో స్థానంలో నిలిచిన ఎఎంపి కేపిటల్స్ రూ. 139 కోట్ చేసింది.

ఎయిర్ పోర్టుల ప్రైవేటీకరణలో భాగంగా సోమవారం కేంద్ర ప్రభుత్వం నిర్వహించిన వేలంలో అదానీ గ్రూపు 5 ఎయిర్ పోర్టులను దక్కించుకుంది. ప్రధానమంత్రి నరేంద్ర మోదీ సొంత రాష్ట్రమైన గుజరాత్ లోని అహ్మదాబాద్ ఎయిర్ పోర్టుతోపాటు జైపూర్, మంగళూరు, త్రివేండ్రం, లక్నో ఎయిర్ పోర్టులు అదానీ గ్రూపు పరమయ్యాయి. వచ్చే 50 సంవత్సరాలపాటు ఎయిర్ పోర్టుల నిర్వహణకు కేంద్ర ప్రభుత్వం బిడ్లను ఆహ్వానించింది. మొత్తం ఆరు ఎయిర్ పోర్టులకు టెండర్లు పిలిస్తే అదానీ గ్రూపు 5 ఎయిర్ పోర్టులకు అతి పెద్ద బిడ్డర్ గా నలిచింది.

తెలంగాణ ఓటాన్ అకౌంట్ బడ్జెట్ అసెంబ్లీ ఆమోదం పొందింది. ద్రవ్య వినిమయ బిల్లుపై జరిగిన చర్చకు సోమవారంనాడు ముఖ్యమంత్రి కె. చంద్రశేఖరరావు సమాధానమిచ్చారు. బిల్లు పాసైన అనంతరం అసెంబ్లీ నిరవధికంగా వాయిదా పడింది. 2019-20 ఆర్థిక సంవత్సరానికి తెలంగాణ ఓటాన్ అకౌంట్ బడ్జెట్ ను ఆర్థిక మంత్రి హోదాలో ముఖ్యమంత్రే ప్రవేశపెట్టారు.

నిర్మాణంలో ఉన్న ఇళ్ళపై పన్ను రేటును 12 శాతం నుంచి 5 శాతానికి తగ్గిస్తూ జీఎస్టీ కౌన్సిల్ ఆదివారం నిర్ణయం తీసుకుంది. అయితే, ఈ నిర్ణయం అమల్లోకి వచ్చాక ఇన్ పుట్ ట్యాక్స్ క్రెడిట్ వర్తించదు. అఫర్డబుల్ హౌసింగ్ పై ఇంతకు ముందున్న 8 శాతం పన్ను రేటు 1 శాతానికి తగ్గనుంది. ఈ నిర్వచనం కిందకు వచ్చే ఇండ్ల నిర్మాణ వ్యయ పరిమితిని రూ. 45 లక్షల వరకు పెంచారు. పన్ను రేట్లలో మార్పులు ఏప్రిల్ 1వ తేదీనుంచి అమలు కానున్నాయి.

‘ప్రతిపాదిత’ హైస్పీడ్ రైలు కారిడార్లలో హైదరాబాద్ నగరం పేరు లేకపోవడంపట్ల టీఆర్ఎస్ వర్కింగ్ ప్రెసిడెంట్ కె. తారకరామారావు (కేటీఆర్) ఆశ్చర్యం వ్యక్తం చేశారు. పత్రికల్లో వచ్చిన వార్తలను ప్రస్తావించిన కేటీఆర్, కేంద్ర రైల్వే మంత్రి పీయూష్ గోయల్ ను ఉద్దేశించి ఆదివారంనాడు ఒక ట్వీట్ చేశారు. ‘‘10 కారిడార్ల ప్రతిపాదనపై వచ్చిన వార్తలో పూర్తిగా నిజం ఉందని అనుకోవడంలేదు. అదే నిజమైతే...దేశంలోని ఐదో అతి పెద్ద మెట్రో నగరాన్ని వదిలేయడంలోని లాజిక్ అర్ధం కావడంలేదు. ఈ విషయంలో క్లారిఫై చేయండి’’ అని పీయూష్ గోయల్ ను కోరారు.

విమానాల తయారీలో ధిగ్గజ సంస్థ బోయింగ్ వ్యాపార రంగంలో అత్యున్నత దశకు చేరింది. 102 ఏళ్ల సంస్థ చరిత్రలో తొలిసారిగా 2018లో 100 బిలియన్ డాలర్ల మేరకు అమ్మకాలను సాధించింది. గత ఏడాది కాలంలో బోయింగ్ 806 విమానాలను ప్రపంచ వ్యాప్తంగా వివిధ సంస్థలకు సమకూర్చింది. 2019లో ఆ సంఖ్య మరింత పెరగనుంది. ఈ సంవత్సరం 895 నుంచి 905 విమానాలను సమకూర్చనున్నట్టు కంపెనీ ప్రతినిధులు తెలిపారు.